اسلام آباد( آوازٹائمز)وفاقی دارالحکومت اسلام آباد کے علاقے شکرپڑیاں میں نائٹ پروگرام کے دوران ٹارگٹ کلنگ کا افسوسناک واقعہ پیش آیا، جس میں فائرنگ سے شدید زخمی ہونے والا نوجوان ہسپتال میں دورانِ علاج دم توڑ گیا۔پولیس کے مطابق مقتول کی شناخت سمیع اللہ کے نام سے ہوئی ہے، جس کا تعلق ضلع کرک سے بتایا جا رہا ہے۔ فائرنگ کے نتیجے میں ڈیوٹی پر مامور پولیس اہلکار حسین شاہ بھی زخمی ہو گئے، جنہیں فوری طور پر ہسپتال منتقل کر دیا گیا ہے۔ابتدائی تفتیش کے مطابق فائرنگ ایک چادر اوڑھے شخص کی جانب سے کی گئی۔ پولیس کا کہنا ہے کہ واقعہ بظاہر ذاتی دشمنی کا شاخسانہ معلوم ہوتا ہے، تاہم مختلف پہلوؤں سے تحقیقات جاری ہیں۔پولیس نے واقعہ کے بعد علاقے کو گھیرے میں لے کر شواہد اکٹھے کر لیے ہیں جبکہ ملزم کی تلاش کے لیے سرچ آپریشن شروع کر دیا گیا ہے۔ واقعہ سے علاقے میں خوف و ہراس پھیل گیا ہے۔مزید تفتیش کے بعد واقعہ کی اصل وجوہات اور ذمہ داران کا تعین کیا جائے گا
