خضدار، رکنِ صوبائی اسمبلی خیر جان بلوچ کے رشتہ دار واجہ عبدالغفور کی رہائش گاہ پر مسلح حملہ، نیشنل پارٹی کی شدید مذمت

خضدار(ڈیلی آوازٹائمز)ترجمان نیشنل پارٹی خضدار نے نیشنل پارٹی کے مرکزی رہنما اور رکنِ صوبائی اسمبلی خیر جان بلوچ کے پھوپھی زاد، بزرگ اور معزز شخصیت واجہ عبدالغفور کی رہائش گاہ پر نامعلوم مسلح افراد کے حملے کی شدید الفاظ میں مذمت کرتے ہوئے کہا ہے کہ اس قسم کے بزدلانہ اور افسوسناک واقعات معاشرے میں خوف و ہراس پھیلانے اور امن و امان کو سبوتاژ کرنے کی مذموم کوشش ہیں، جنہیں کسی صورت برداشت نہیں کیا جا سکتا۔ترجمان نے کہا کہ بزرگ شخصیات اور معزز شہریوں کو نشانہ بنانا نہ صرف قابلِ مذمت عمل ہے بلکہ یہ بلوچ روایات، سماجی اقدار اور انسانی اصولوں کے بھی سراسر منافی ہے۔ ایسے واقعات عوام میں بے چینی پیدا کرتے ہیں اور ریاستی اداروں کی ذمہ داری ہے کہ وہ شہریوں کے جان و مال کے تحفظ کو یقینی بنائیں۔انہوں نے حکومت اور متعلقہ قانون نافذ کرنے والے اداروں سے مطالبہ کیا کہ واقعے کی فوری، شفاف اور غیرجانبدارانہ تحقیقات کر کے حملے میں ملوث عناصر کو قانون کے کٹہرے میں لایا جائے تاکہ آئندہ ایسے واقعات کی روک تھام ممکن ہو سکے۔ضلعی ترجمان نے واجہ عبدالغفور اور ان کے اہلِ خانہ کے ساتھ مکمل یکجہتی اور ہمدردی کا اظہار کرتے ہوئے دعا کی کہ اللہ تعالی انہیں اپنی حفاظت میں رکھے، علاقے میں امن و امان قائم رہے، اور عوام کے جان و مال کا تحفظ ہر صورت یقینی بنایا جائے