چین میں ڈیم ٹوٹنے سے سانپوں کے فارم سے 900 سانپ فرار، زہریلے کوبرا اردگرد کے علاقوں میں پھیل گئے

بیجنگ(ڈیلی آوازٹائمز) چین میں ایک ڈیم ٹوٹنے کے بعد سانپوں کے ایک فارم سے تقریباً 900 سانپ فرار ہو گئے، جن میں زہریلے کوبرا بھی شامل ہیں۔ حکام نے سانپوں کے قریبی آبادیوں میں پھیلنے کے خدشے کے پیشِ نظر شہریوں کو فوری احتیاطی تدابیر اختیار کرنے کی ہدایت جاری کر دی ہے۔چینی حکام کے مطابق حالیہ بارشوں اور سیلابی صورتحال کے باعث ایک ڈیم کو نقصان پہنچا، جس کے نتیجے میں قریب واقع سانپوں کے فارم کا حفاظتی نظام متاثر ہوا اور تقریباً 900 سانپ فارم سے نکل کر اطراف کے علاقوں میں پھیل گئے۔رپورٹس کے مطابق فرار ہونے والے سانپوں میں متعدد زہریلی اقسام، خصوصاً کوبرا، بھی شامل ہیں، جس کے باعث مقامی انتظامیہ اور ریسکیو اداروں کو ہائی الرٹ کر دیا گیا ہے۔ حکام نے شہریوں کو ہدایت کی ہے کہ وہ کھیتوں، آبی گزرگاہوں اور جھاڑیوں کے قریب غیر ضروری نقل و حرکت سے گریز کریں اور کسی بھی سانپ کی موجودگی کی اطلاع فوری طور پر متعلقہ اداروں کو دیں۔انتظامیہ نے سانپوں کی تلاش اور انہیں محفوظ طریقے سے پکڑنے کے لیے خصوصی ٹیمیں تعینات کر دی ہیں، جبکہ متاثرہ علاقوں میں نگرانی بڑھا دی گئی ہے۔ مقامی حکام کا کہنا ہے کہ صورتحال پر مسلسل نظر رکھی جا رہی ہے اور شہریوں کے تحفظ کے لیے تمام ضروری اقدامات کیے جا رہے ہیں