وزیراعظم شہباز شریف کا ملائیشین ہم منصب ڈاکٹر انور ابراہیم سے ٹیلی فونک رابطہ، علاقائی امن اور دوطرفہ تعاون پر تبادلہ خیال

اسلام آباد(ڈیلی آوازٹائمز)وزیراعظم محمد شہباز شریف اور ملائیشیا کے وزیراعظم ڈاکٹر انور ابراہیم کے درمیان ٹیلی فونک رابطہ ہوا، جس میں دونوں رہنماؤں نے پاکستان اور ملائیشیا کے بڑھتے ہوئے دوطرفہ تعاون، تجارت و سرمایہ کاری کے فروغ اور خطے کی صورتحال پر تبادلہ خیال کیا۔ ڈاکٹر انور ابراہیم نے علاقائی امن کے لیے پاکستان کی کوششوں اور وزیراعظم شہباز شریف و فیلڈ مارشل سید عاصم منیر کی قیادت کو سراہا، جبکہ دونوں رہنماؤں نے مستقبل قریب میں ملاقات اور باہمی تعاون کو مزید وسعت دینے پر اتفاق کیا۔تفصیلات کے مطابق دونوں رہنماؤں کے درمیان ہونے والی گفتگو کے دوران وزیراعظم محمد شہباز شریف نے ڈاکٹر انور ابراہیم کی خیریت دریافت کی اور ان کی جلد اور مکمل صحت یابی کے لیے نیک خواہشات کا اظہار کیا۔دونوں وزرائے اعظم نے پاکستان اور ملائیشیا کے درمیان دوطرفہ تعاون کی موجودہ مثبت پیش رفت پر اطمینان کا اظہار کیا۔ دونوں رہنماؤں نے اس رفتار کو مزید آگے بڑھانے، بالخصوص باہمی تجارت اور سرمایہ کاری کے روابط کو فروغ دینے کے عزم کا اظہار کیا۔گفتگو کے دوران علاقائی صورتحال، بالخصوص خلیج کی صورتحال، بھی زیرِ بحث آئی۔ ڈاکٹر انور ابراہیم نے پاکستان کی علاقائی امن کے لیے کی جانے والی کوششوں کو سراہا اور وزیراعظم محمد شہباز شریف اور فیلڈ مارشل سید عاصم منیر کی قابلِ تحسین کوششوں، قیادت اور رہنمائی پر اظہارِ تشکر کیا۔وزیراعظم محمد شہباز شریف نے علاقائی امن کے لیے پاکستان کی کوششوں کی مسلسل حمایت پر اپنے ملائیشین ہم منصب کا شکریہ ادا کیا۔ انہوں نے اس عزم کا اعادہ کیا کہ پاکستان امن کے فروغ کے لیے ملائیشیا سمیت برادر اور دوست ممالک کے ساتھ قریبی تعاون جاری رکھے گا، بالخصوص مشرقِ وسطیٰ میں پائیدار امن کے قیام کے لیے مشترکہ کوششیں جاری رکھی جائیں گی۔دونوں رہنماؤں نے مستقبل قریب میں باہمی طور پر موزوں موقع پر ملاقات کرنے پر اتفاق کیا۔وزیراعظم محمد شہباز شریف نے وزیراعظم ڈاکٹر انور ابراہیم کو اپنی سہولت کے مطابق جلد از جلد پاکستان کا سرکاری دورہ کرنے کی دعوت بھی دہرائی