ایف سی کمانڈرز کی زیارت کے شہدا کے لواحقین سے ملاقات، پولیس اہلکاروں کی قربانیوں کو خراجِ عقید ت

کوئٹہ(ڈیلی آوازٹائمز)فرنٹیئر کور (ایف سی)بلوچستان (نارتھ) کے کمانڈرز نے زیارت میں دہشت گردی کے واقعے میں شہید ہونے والے پولیس اہلکاروں کے لواحقین سے ملاقاتیں کیں، شہدا کی قبروں پر پھولوں کی چادریں چڑھائیں، فاتحہ خوانی کی اور سوگوار خاندانوں سے دلی تعزیت و ہمدردی کا اظہار کیا۔جاری بیان کے مطابق زیارت میں دہشت گردی کے حالیہ واقعے میں پولیس کے 27 اہلکار شہید ہوئے، جنہوں نے دہشت گردوں کا بہادری سے مقابلہ کرتے ہوئے جانوں کا نذرانہ پیش کیا۔ بیان میں کہا گیا کہ ان میں سے 18 اہلکاروں کو دہشت گردوں نے یرغمال بنایا، تاہم انہوں نے ہتھیار ڈالنے یا ریاست کی سلامتی پر سمجھوتہ کرنے کے بجائے جان کی قربانی دے کر فرض شناسی اور جرات کی اعلی مثال قائم کی۔ایف سی حکام نے کہا کہ شہدا کی قربانیاں پوری قوم کا سرمایہ ہیں اور ان کا خون ہرگز رائیگاں نہیں جانے دیا جائے گا۔ انہوں نے اس عزم کا اظہار کیا کہ دہشت گردی کے خلاف جنگ میں تمام قانون نافذ کرنے والے ادارے متحد ہیں اور ملک کے امن و استحکام کے لیے مشترکہ جدوجہد جاری رکھیں گے۔ملاقاتوں کے دوران ایک اعلی ایف سی افسر نے کہا، “ہمارے پولیس کے بھائیوں کا خون ہم سب پر ایک قرض ہے۔ ہم اس دکھ کو ایک ہی خاندان کی طرح محسوس کرتے ہیں اور دہشت گردی کے خلاف ایک ہی محاذ پر متحد کھڑے ہیں۔”ایف سی حکام نے شہدا کے اہل خانہ کو یقین دلایا کہ ان کے پیاروں کی قربانیوں کو ہمیشہ یاد رکھا جائے گا اور دہشت گردی میں ملوث عناصر کو قانون کے مطابق انجام تک پہنچانے کے لیے تمام ممکنہ اقدامات جاری رہیں گے