بدخشاں میں طالبان مخالف جنگجوؤں کا حملہ، طالبان کمانڈر ہلاک

کابل (ڈیلی آوازٹائمز) افغانستان کے شمال مشرقی صوبے بدخشاں میں طالبان مخالف مسلح جنگجوؤں اور طالبان کے درمیان شدید جھڑپوں کے دوران ایک طالبان کمانڈر کے ہلاک ہونے کا دعویٰ کیا گیا ہے۔میڈیا رپورٹس کے مطابق جھڑپیں ضلع زیبک کے علاقے توپ خانہ میں ہوئیں، جو پاکستان کی سرحد کے قریب واقع ہے۔طالبان مخالف جنگجوؤں نے طالبان کی متعدد چوکیوں پر حملہ کیا، جس کے بعد دونوں جانب سے شدید فائرنگ کا تبادلہ ہوا۔مقامی ذرائع کا کہنا ہے کہ حالیہ لڑائی ماضی کی محدود جھڑپوں سے مختلف ہے کیونکہ اس بار کئی محاذوں پر براہ راست مقابلہ جاری ہے۔مقامی ذرائع نے دعویٰ کیا ہے کہ جھڑپوں میں فرید اللہ وحدت نامی طالبان کمانڈر مارا گیا، جو بدخشاں میں طالبان کی ایک سرحدی چوکی کا انچارج تھا۔ذرائع کے مطابق اس کی لاش کی تصویر بھی سامنے آئی ہے، ذرائع کا کہنا ہے کہ طالبان کو جانی نقصان اٹھانا پڑا ہے، تاہم ہلاک اور زخمی ہونے والوں کی حتمی تعداد واضح نہیں ہو سکی۔اطلاعات کے مطابق جھڑپوں کے بعد دونوں فریقوں نے اپنی پوزیشنیں مضبوط بنانے کے لیے مزید نفری بھی طلب کر لی ہے، جس سے علاقے میں کشیدگی بڑھ گئی ہے