کوئٹہ(آوازٹائمز /انعام اللہ اچکزئی)بلوچستان کے مختلف شہروں میں صبح سورج طلوع ہونے سے قبل آسمان پر ایک دلکش اور غیر معمولی قدرتی منظر دیکھنے میں آیا، جس نے شہریوں کو حیرت اور مسحوریت میں مبتلا کر دیا۔ صوبائی دارالحکومت کوئٹہ میں آسمان کے مختلف حصوں پر رنگ برنگی شعاعیں، بادلوں کی منفرد ساخت اور روشنی کے حسین امتزاج نے فضا کو سحر انگیز بنا دیا۔عینی شاہدین کے مطابق صبح سویرے آسمان پر نارنجی، سرخی مائل، نیلے اور ہلکے جامنی رنگوں کی روشنی بادلوں سے ٹکرا کر مختلف زاویوں میں بکھر گئی، جس نے منظر کو کسی مصور کی تخلیق سے تشبیہ دی۔ شہریوں نے ان دلکش مناظر کو اپنے موبائل کیمروں میں محفوظ کیا، جو دیکھتے ہی دیکھتے سوشل میڈیا پر وائرل ہو گئیں۔ماحولیاتی ماہرین اور محکمہ موسمیات کے حکام کے مطابق یہ مظہر قدرتی موسمیاتی عمل کا نتیجہ ہے جو مخصوص حالات میں وقوع پذیر ہوتا ہے۔ ماہرین نے کہا کہ طلوعِ آفتاب کے وقت جب سورج کی شعاعیں مخصوص زاویے سے بادلوں سے ٹکراتی ہیں تو روشنی بکھر کر مختلف رنگوں کی صورت میں نظر آتی ہے۔ حکام نے واضح کیا کہ یہ ایک عام فطری مظہر ہے اور اس میں کسی قسم کی آفت یا خطرے کا کوئی پہلو نہیں۔دوسری جانب، سنجاوی اور توبہ کاکڑی کے علاقوں میں صبح سویرے آسمان پر پراسرار سفید لکیریں نمودار ہوئیں جنہوں نے عوام میں تجسس اور تشویش کی فضا پیدا کر دی۔ یہ لکیریں طویل وقت تک آسمان پر موجود رہیں، جنہیں بعض شہریوں نے جہازوں کے گزرنے کے بعد بننے والے بخاراتی نشانات (Contrails) قرار دیا۔شہریوں نے اس خوبصورت منظر کو فطرت کی عظمت اور سکون کا پیغام قرار دیتے ہوئے دعا کی کہ بلوچستان کی فضائیں ہمیشہ اسی طرح پرامن، روشن اور خوبصورت مناظر سے آراستہ رہیں
