صوبوں کے درمیان مساوی حقوق پر یقین رکھتے ہیں،پروفیسر حلیم صادق

کوئٹہ(آوازٹائمز)عوام پاکستان پارٹی بلوچستان کے صوبائی جنرل سیکرٹری پروفیسر ڈاکٹر حلیم صادق نے کہا ہے کہ بلوچستان پاکستان کا سب سے بڑا اور وسائل سے مالا مال صوبہ ہے، مگر بدقسمتی سے یہاں کے عوام آج بھی بنیادی سہولیات سے محروم ہیں۔ انہوں نے کہا کہ تعلیم، صحت، روزگار اور امن و امان جیسے اہم شعبوں میں فوری اور عملی اقدامات کی اشد ضرورت ہے۔ بلوچستان کے نوجوان باصلاحیت ہیں، مگر انہیں مواقع فراہم نہیں کیے جا رہے، جس کی وجہ سے مایوسی میں اضافہ ہو رہا ہے۔انہوں نے کہا کہ عوام پاکستان پارٹی ملک میں آئین کی بالادستی، جمہوری روایات اور تمام صوبوں کے درمیان مساوی حقوق پر یقین رکھتی ہے۔ پارٹی سمجھتی ہے کہ وسائل پر پہلا حق مقامی عوام کا ہے اور بلوچستان کے وسائل کو بلوچستان کی ترقی کے لیے استعمال کیا جانا چاہیے۔ پروفیسر ڈاکٹر حلیم صادق نے کہا کہ پائیدار امن صرف طاقت سے نہیں بلکہ انصاف، مکالمے اور اعتماد سازی سے قائم ہوتا ہے۔ انہوں نے واضح کیا کہ عوام پاکستان پارٹی بلوچستان کے عوام کی آواز ہر فورم پر بلند کرتی رہے گی اور کسی بھی ناانصافی پر خاموش نہیں رہے گی۔ آخر میں انہوں نے کہا کہ ایک مضبوط، مستحکم اور خوشحال پاکستان کے لیے ضروری ہے کہ بلوچستان کو اس کا جائز مقام دیا جائے اور عوام کو فیصلہ سازی میں شریک کیا جائے