مشرق وسطیٰ میں بڑھتی کشیدگی پر پاکستان کا اظہار تشویش، تمام فریقین سے تحمل کی اپیل

اسلام آباد(آوازٹائمز) پاکستان نے مشرق وسطیٰ کے خطے میں کشیدگی میں اضافے پر گہری تشویش کا اظہار کرتے ہوئے تمام فریقین پر زور دیا ہے کہ وہ تحمل کا مظاہرہ کریں اور ایسے اقدامات سے گریز کریں جن سے خطے کے امن و استحکام کو مزید نقصان پہنچنے کا خدشہ ہو۔ترجمان دفتر خارجہ کے مطابق خطے میں کسی نئے تنازع کا آغاز کسی بھی فریق کے مفاد میں نہیں۔ پاکستان نے تمام متعلقہ فریقین سے اپیل کی ہے کہ وہ کشیدگی کم کرنے کے لیے ذمہ دارانہ طرز عمل اختیار کریں اور ایسے اقدامات سے اجتناب کریں جو حالات کو مزید پیچیدہ بنا سکتے ہیں۔دفتر خارجہ نے کہا کہ امن کے قیام کے لیے مسلسل رابطہ، مذاکرات اور سفارتکاری ہی واحد راستہ ہے۔ پاکستان تمام فریقین پر زور دیتا ہے کہ وہ اسلام آباد مفاہمتی یادداشت پر عملدرآمد کو یقینی بنائیں، کیونکہ یہ یادداشت خطے میں باہمی احترام، افہام و تفہیم اور مشترکہ خوشحالی کے لیے ایک مضبوط بنیاد فراہم کرتی ہے۔ترجمان دفتر خارجہ نے کہا کہ پاکستان خطے میں امن و استحکام کے فروغ کے لیے اپنا کردار جاری رکھنے کے عزم کا اعادہ کرتا ہے اور امن کے قیام کے لیے ہر ممکن تعاون فراہم کرتا رہے گا۔پاکستان نے امید ظاہر کی کہ تمام فریقین مذاکرات اور سفارتی ذرائع کے ذریعے مسائل کے حل کو ترجیح دیں گے تاکہ خطے میں پائیدار امن اور استحکام کو یقینی بنایا جا سکے