کراچی کا پریمی جوڑا اپنی فریاد لے کر حب پریس کلب پہنچ گیا

حب (آوازٹائمز)کراچی سے تعلق رکھنے والا پریمی جوڑا اپنی فریاد لے کر رپورٹرز پریس کلب حب پہنچ گیا۔ نوجوان محمد علی خان اور ان کی اہلیہ علیشہ خان نے پریس کانفرنس کرتے ہوئے بتایا کہ انہوں نے اپنی مرضی اور رضامندی سے 30 ستمبر کو سٹی کورٹ کراچی میں کورٹ میرج کی، مگر علیشہ کی سوتیلی والدہ اور خاندان کے چند افراد شادی کو تسلیم کرنے کے بجائے جھوٹے مقدمات درج کروا رہے ہیں۔علیشہ خان نے بتایا کہ انہیں زبردستی کسی اور سے شادی پر مجبور کیا جا رہا تھا، مگر انکار پر پولیس کے ذریعے ان کی اور شوہر کی زندگی اجیرن بنا دی گئی ہے۔ انہوں نے الزام لگایا کہ سوتیلی والدہ بااثر شخصیات کے ذریعے پولیس پر دبا ڈال رہی ہیں جس کے باعث ان کے شوہر، سسر اور دیگر اہل خانہ کے خلاف اغوا اور دیگر جھوٹے مقدمات بنائے جا رہے ہیں۔محمد علی خان نے کہا کہ نکاح مکمل قانونی طریقے سے 30 ستمبر کو عدالت میں انجام پایا جس کے تمام ثبوت موجود ہیں، مگر پولیس مسلسل ہراساں کر رہی ہے اور ہمارے گھر پر چھاپے مارے جا رہے ہیں۔علیشہ اور محمد علی خان نے آئی جی سندھ اور وزیراعلی سندھ سے مطالبہ کیا ہے کہ ان کے معاملے کی شفاف تحقیقات کرائی جائیں اور انہیں انصاف و تحفظ فراہم کیا جائے تاکہ وہ سکون سے اپنی زندگی گزار سکیں